Tijmanauiaj Totlalui Maluili
Neliixayak totekij uan totemachilis ken Nauas ne tijmokuitlauisej tlali, atl, ejekatl uan nochi tlamantli maluili tlen tochinanko. Ijkatsaj ualas se sanilkualantli tlen se tlanauatili tlen seyok altepetl ueyi, tlanauatijketl tlen Mexko o se tlalpixketl, amo tijmakasej manoj ma kixoleua totlalui, atl, tlatokmej tlen kampa eltok kampeka.
Altepetl Makuilojtli tlakatki itemachilis kimokuitlauis kanajya maluili tlen tochinanko kemaj tijmatkej tlen se totsakual maluili kiijtlakotoya san pampa se kinejki ika se tepostlaxaualistli.
Kemaj se uanya monojnotski ika tlayekananij tlen chinankomej para keuak ma moketsa ne tlaxoleuali, tikinmatilijkej tlen tlauel kipiya ipatij ne kanajya para toaltepej uan nojkiya tlen ualtok, sanilkualantli tlen tlaichtekilistli tlen ne tlanauatianimej uan sekij tlalpiyanij. Pan yaya ni techtlajtlanilijkej tlen ueli mochiuas. Uajka kemaj titemaktilijkej totemachilis uajkapayotl tlen kenijki mokuajtlalis nochi tochinanko maluili para ma sampa eli itlatlajkopa tokampeka.
Desde ken achtoui timonechikojekj ininuanya pilaltepetsijmaseualmej, tiueltokej tijpiyaj kuali ojtli ika miak tekiojtli tlen kitemoaj kixoleuasej uan kiijtlakosej miak tlen maluili totsakual.
Tisenkuiliaj timonechikoaj uan tijchikauiliaj topilaltepeuaj para tikixnamikisej ni sanilkualantli pan totlaluaj uan tijmanauisej totemachilis uajkapayotl, totlanauatilis uan tochikauilis para tijmanauisej uan tijmokuitlauisej.